Madhushala

These are few verses that Vinit has written...and it is his shradhanjali to Sri Harivansh Rai Bachchan's Madhushala
I am quite sure that this will be the best post ever to appear on my blog :)

Mitron Sang, jab baith kahin par
Takrata pyalon se pyala
Mann main thoda saku-chaye hue
Har naya naya peene wala

Ghunt ghunt se bunta jata
Jeewan ka tana bana

Aaj unhi phir sapnon ko,
Aur sajati, madhushala

Dhan-dhanadyon se keemati,
Matwale ka hota pyala
Besh keemti gehno main bhi,
Nirdhan dekhti saaki bala,

Saksham hai dhanwaan yahan par,
har karya siddh, kar sakne ko

Par dhani-bali mahapurushon ko
Har raat bechti madhusala



Piya piya keh adharon main,
Jaa simat-ti hai haala
Taj kar apna maan dharma
‘kar’ ko arpit, hota pyala

Prem samarpan ke sambandhon ka
Main naya roop dikhlata hoon

‘hari’ (vansh rai bachchan) ke komal charano main
Arpit meri, madhushala

Raat chamakti tapte suraj si,
Din dikhayi deta kala
Varsha se tap jaati dharti,
Yadi, piye na koi peenewala,

Raat din ke chakra vyuh main,
Kaun phansa hai, kaun phasega,

Din ko raat, raat ko din,
Aaj banati madhushala

Waqt khushi ka ho ya gham ka
Kahaan gaya, inse taala,
Mauka milte hi adharon se,
Lag jati, inke haala

Ankhoon main dard na dikhta mujhko
Aur na hotoon par muskaan

Mann main jasn aur maatam inke
Roz manaye madhushala

Kis disha main jaaun jo mujhko
Mil jaaye bas ek pyala
Kis rah main jaaun jo mujhko
Dikh jaaye, saaki bala

Door bahut aa gaya hoon ghar se
Ab raat kahaan bitaunga

Rah koi batla de mujhko
Jo pahuchaaye, madhushala

Mulla kehta jannat le jaaye
Uska woh allahtala,
Pandit kehta naiya sabki
Paar lagaye, brij ka gwala

Do ghoont peekar tum sabko
Satya main yeh samjhata hoon

Ek kadam andar rakhte hi
Moksha dilate madhushala

Padho namazain mazjid main
Sune na who allahtala
Karo aarti mandir main
Sune na who, brij ka gwala

Khoob bula kar dekha hoga
Aayat se, chalisa se

Zara si lekin aahat par he,
Khul jaati hai, madhushala

Jitna bhi bada gum aaye
Sau meel door karta pyala
Kitni bhi choti khushi mile
Sau guni badha deti, hala

Gumo ko apne kam karke
Khoob badhayi hain khushian

Jeevan ke har such dukh main
Saath nibhati, madhushala